小孩何錯之有

昨晚到二姑奶家做節, 二姑奶拿了張小型桌球枱出來給小朋友玩, 幾個小朋友都十分興奮地幫忙打開桌球枱, 特別是細佬, 他平時在家已拿波波扮玩的了, 他其實是最想玩的哪個, 所以一見快砌好枱就已立即拿了支桌球棍......

好不容易set好枱, 枱高度剛好到細佬的眼睛位置, 二姑奶一見立即拍手說:"呵, 你唔食飯, 唔够高, 無得玩, 想玩就擔凳仔啦....."
細佬一聽到已立即眼紅走回我處攬位我喊 (他平時很介意別人話他矮的),
二姑奶再說:"咁眼淺架你......" 拿左盒波出來跟細佬說:"不如你幫我砌好D波先, 然後就俾你玩啦......."
細佬不理他還是攬住我喊, 我同細佬講:"姑媽話俾你玩, 砌完波就可以玩啦, 快D去啦......." 細佬雖然有D不情願, 但都走埋張枱邊,
但二姑奶又講:"你砌左波先, 擺底支棍先(細佬一直拿位棍的), 拿住棍砌唔到波喎,......"
細佬沒有出聲, 但就是拿著棍不放, 二姑奶一直在他身邊要求他放下棍, 說數十聲放下棍就俾佢玩, 但細佬就是不肯,
奶奶就在一邊鬧:"咁固執, 唔聽人講, 唔好俾佢玩, 由佢啦......."
細佬聽到更加拿實支棍唔放,
二姑奶講下講下, 奶奶鬧下鬧下, 細佬更加堅持, 最後二姑奶把細佬遂隻手指拉開想拿走支棍, 奶奶就鬧:"咁野蠻, 唔好理佢, 扔左佢去街啦, 唔好俾佢返來...寵壞曬啦已經...."
二姑奶:"真係好惡, 已經寵壞左啦, 唔聽人講野......."
奶奶不斷在旁:"咁野蠻, 咁硬頸, 掉佢去街啦, 無用架啦......."
聽到依度, 爸爸就頂唔住, 一手搶走支棍, 捉左細佬過來大聲喝問:"放唔放手? 咁硬頸做咩?" "現在離食飯有6分鐘, 你喊曬D時間就無得玩架啦......"

本來一件小事發展到這個情況, 其實我真是看不到一個小朋友錯在哪裡, 他是錯在不聽話嗎, 他由始至終真沒做過一件"哎"事, 只不過被人話矮唔開心喊一下而已, 然後就俾D所謂大人加個帽子說不聽話, 結果他就真的不聽話給大家看了, 結果七嘴八舌的給他扣下越來越多帽子.......其實, D大人話出口邊時, 有沒想過一個五歲的小朋友真的懂得在這麼多帽子下調節自己, 變成大人心目中的好小朋友嗎?

看著情況越來越失控, 從爸爸手上拉了細佬過來, 輕聲數了十聲, 細佬已慢慢控制到自己情緒......只是剩下少許喘泣.......
我:"唔使喊啊, 你有事要講出來先的, 人地唔係你個腦, 唔會知道你想點架, 你唔開心要講出來人地先會知的......"
細佬一邊喘泣一邊細細聲講:"人地...人地....要自己企....玩......"
二姑奶走來蹲在細佬身邊說:"你快D收聲, 我俾張凳你, 你幫我砌好D波, 我們一齊玩啦......"
細佬聽到又大聲喊起來,
奶奶:"咁"哎", 唔好要佢, 咁硬頸, 扔左佢去街......."
環迥立體聲下, 我也有點無能為力, 只好說:"現在已經過了3分鐘了, 你剩返2分鐘左右玩, 你要快點控制好自己情緒了, 否則媽媽都唔理架啦......"
奶奶:"咁硬頸, 唔好理佢啦, 唔好倖佢玩........"
最後够鐘, 細佬還是控制不到, 收不到聲.....二姑奶就叫其他小朋友收起D波, 舖枱食飯了.....
這時爸爸一把抱左佢出門, 走到電梯大堂......
看到老公失控, 只好跟著追出去看, 到門口還聽到姑奶在說:"寵壞左啦, 咁硬頸......."
實在忍不住, 在門口停下對她說:"其實細佬是個很守規距的小朋友, 只是性格較固執, 而且要面子, 你剛剛話佢矮, 其實佢很介意的......"

在大堂抱返細佬回到門口邊時, 跟他說了一下情況, 告訴他你真的做錯左, 本來大家開開心心的一個Party, 現在就因為他搞到個個嬲曬, 問他知不知道自己做錯什麼, 要求他說出自己錯在什麼, 其實他根本說不出自己錯什麼的, 告知他其實姑媽只是跟他開玩笑, 不是不準他玩, 只是想他跟規則而已, 但現在其他小朋友因為你堅持拿著棍執波, 結果人人無得玩, D大人又個個嬲曬唔開心, 都是因為你, 所以你今次係做錯左了, 依家你只有兩種選擇, 一是入返去自己同每個人講對不起, 大家就會原諒你, 二是自己一個落公園玩........

細佬選擇了前者, 他用了3分鐘左右平息左自己情緒, 然後說自己行入門口, 二姑奶走到門口蹲下跟他道歉, 說唔應該話佢矮, 還答應佢第二天可以俾佢再來玩桌球, 細佬一邊喘泣一邊同佢講左對唔住, 之後又走到奶奶面前講對唔住, 之後又走到每個人面前遂個講對唔住, 其實細佬真係好有勇氣的, 換著我小時候, 我是做不到的 (我小時候就是細佬這個性格) (事後我應該要讚返佢的, 但忘記了, 一陣接放學時補返)......

事件大致這樣, 不是想說誰是誰非, 只是想說, 小朋友雖然細, 思考不周全, 但他們也是有自尊心的, 有時候喊, 固執堅持, 其實是不是一種錯呢? 大人是不是應該寬宏大量一點, 俾一點空間他們, 讓他們收拾自己心情呢? 非要趕盡殺絶?

還有一事要提一提, 食飯時, 忘了說什麼話題, 二姐夫有點自豪地說:"家中電腦, 電視擺係度, 阿女都唔够膽開, 因為她知道一定要做曬功課, 溫曬書才可以開, 否則是永遠無得開的......"

其實我是反而有點擔心, 不够膽只是因為能力不足, 害怕威權而已, 當有一天, 以為自己能力已豐之時, 這個情況會令人擔憂啊, 特別是小表姐已11歲, 步入青春反叛期的時候.......如果是我, 我寧願孩子是自己明白不可做而不去做, 不是因為害怕而不去做, 雖然教導的過程可能會漫長點, 但我覺得值得~