幼師薪酬標準

一直對此議題沒什麼意見，反而是較傾向定立的，因覺得老師肩負輔導小朋友的重任， 應該要給好的代遇給他們的，但昨日發生一件小事就令我想法有點改變！

事件中本人亦有做不足的地方，是需要再做好一點的，但綜觀整件事其實只是一件非常小的小事，但郤令激氣及憂心的。

事緣昨天早上阿女又賴床，所以又再一邊咬包一邊返學，去到差不多學校門口都食完包了，阿女很心急飲最後一啖水（因為怕班主任老師睇到去到學校門口才食早餐）， 結果就“濁”到，結果就嘔了最後那啖包連水出來在地上，當時我手上只有一樽水及無紙巾，於是唯有把全樽水倒下去盡量沖走那啖包，而剛好同時間有幾個家長帶著仔女路過，一邊行過一邊走到學校門口講，我掛著用手上水來沖地, 所以也沒有望向他們是否同老師講，但聽到他們是在值日老師那個位置講左幾句，於是我用完手上的水後雖然沒有完全沖乾淨，心想等下學校都會有人沖了，於是把阿女交給值日老師就走了．．．．．．

到了中午1點多，收到學校連續五個電話，頭四個沒有聽到（因為同阿仔上緊堂），到第五個才接聽到，阿女班主任老師打來的，話有幾個家長投訴阿女早上嘔而無清理，我立即同老師解釋係飲水“濁”到才嘔了一啖包，我當時手上只有水沖，無紙巾，又聽到有家長在值日老師那邊位置講過，以為學校會清潔，所以無再同當值老師講聲，然後老師就話：“咁你都要你自己過來同學校講，D個係個人衛生問題，小朋友嘔可大可小，人人行過踏到會傳染開去的．．．．．．”， 

我：“老師，我都明白小朋友嘔可大可小，但似乎都唔關個人衛生問題喎, 阿女自己都唔想嘔的，我都解釋了有自己用水沖，且聽到有家長在值日老師那邊位置講過，以為學校會清潔，所以無親自同學校講聲同等埋學校清潔左先走，但咁都唔應該話我同個小朋友無個人衛生架，之前阿女有個同學都是在學校門口嘔，人地媽咪都係忙住拿紙巾抺，都係其他家長代通知學校啦．．．．．．”

老師：“咁你下次要同學校講勒．．．沖唔晒都要拿塊紙皮蓋住佢．．．D個係個人衛生問題．．．．．
”

我心想如果我有紙皮咁多物資，依家唔使係度同你解釋，係咪要我跪地認錯先得呢：“老師，我依家上緊堂，不如等陣叫埋校長放學一齊傾下D個個人衛生問題啦．．．．．”

老師無講野，就收左線．．．．．．．

放學接阿女，見到班主任老師，我問：“老師，係咪傾下個人衛生問題啊？”

老師笑笑口，完全無請我入學校或叫校長一齊傾的意思：“D件小事啫，你要傾咪傾咯．．．．．”

我心想都費事搞大件事了，大家講清楚件事就算，於是就企門口同佢傾，再一次同佢講返早上的情況，問：“咩唔係有其他家長同值日老師講過咩？”

老師：“係啊，係有幾個家長講過．．．．．．”

我心想，唔係有幾個家長投訴咩？？ 現在變左講過．．．．．咁人地講左俾值日老師知（如果唔係你點知）， 咁點解學校又唔清潔？？？

我：“咁學校無清潔咩？”

老師：“有清潔．．．．．．同學X上次嘔，我地學校姐姐都即刻洗地．．．．．但你下次都要同我地講聲的， 咪使人地以為你無處理過就走左喎．．．．．”

我心想就算你當我講大話，當我無沖水， 咁你咪直接同我講你要同學校匯報咯， 唔使係度強調我無個人衛生， 而其他家長都同你地講左， 點解你地都唔即刻出來處理， 另外咩兩件事有分別咩？？？

我：“咁小的事，咁多人講同你地報告，你地學校咪好唔得閒？”

老師茄茄笑下．．．．．．

整件事起因是本人做的不足，但過程似乎是玩針對多點（因之前同此老師有過幾番爭拗及不服從她命令的，首先是她要求毛巾盒裡的毛巾要在家整濕才帶回校，但因細菌滋生問題，我們是沒有跟從的，同佢解釋過佢最後她是無奈接受的；另外就是單獨接見家長一事，試過為了就爸爸假期改時間，老師就話下次唔使等爸爸放假先約見啦，人地其他家長個個都係單獨來見的．．．再一事就是對上一次聯校親子運動會，雖然填了４人出席，但老師就唔批准，話因為場地有限，只限父母，兄弟姐妹不準到，到當日因找不到人湊細佬，於是此老師話既然無人湊，咁就媽咪或爸爸湊細佬，其中一個同阿女玩啦，咁無辦法唯有我湊細佬在室外坐著等啦，但又見到其他學校學生都是雙方家長帶同兄弟姐妹一齊到的，於是好奇下就跟著其他學校的人跟進室內了，只是混在其他學校學生那邊遠遠看著而已，但最後還是被這老師發現及趕了出去，但後來到分組到另一禮堂比賽時，校長見我們坐外面看，都主動叫我們入去看，仲同我傾了十多廿分鐘呢，比賽離開時校長還不斷撩阿女同細佬玩添，都不明這老師究竟用什麼標準）。

不過為了阿女的學校file，都費事搞大件事，所以答：“無事了，下次會親自同你地講．．．．．”

回家後，我問阿女：“老師今日有無問你點解嘔啊？”

阿女：“有啊．．．．．”

我：“咁你點答啊？”

阿女：“我話飲水咯．．．．．”

我：“咁老師點講啊？”

阿女：“老師話嬲我咯，嘔完唔理就走左去．．．．．．”

我不知道這個班主任老師是打電話俾我之前問還是之後問阿女嘔的原因, 又或阿女有沒有全部講晒對答俾我聽，但以這幾句話來說，似乎不論之前問還是之後問，又或阿女有沒有覆述同老師的全部對話，這老師似乎都處理得十分之不合當．．．．．．

之前問太武斷了，未搞清事實就已斷定小朋友唔啱，家長又唔做好；若是之後問，既然知道事情真相了，為何仲要咁講？假設這班主任老師認定作為媽咪的我講大話，咁都唔應該當住小朋友面咁講啊，至多可以直接同小朋友講：咁你下次嘔就一定要立即同當值老師講返喎，同埋叫媽咪同學校講返喎，等姐姐即刻出來清潔．．．．．之類的話，再來同返作為媽咪的我講返要同學校匯報，那麼整件就完結了, 而唔係同小朋友講“嬲你嘔完唔理就走”咁的說話。

作為一個班主任老師這樣同小朋友講，小朋友會點諗呢？係咪會令到小朋友覺得自己做錯，而媽咪又做錯，小朋友會否疑惑，點解媽咪都唔做好架？那麼試問以後媽咪點樣再繼續管教子女？這個班主任老師的目的何在？分化小朋友同家長的關係，等小朋友完全信服佢？還只是她在這個case處理不足？

其實那一個答案也沒什麼所謂，事件已過去也無謂追究，只是想借此事說明一個情況，幼師薪酬標準一出，就真的抺殺晒那些真正有能力有熱誠的好老師了。