迪迪尼後一件趣事

昨晚去完迪迪尼，開開心心搭地鐵回家，但臨落車郤發生一件當時好忟，事後又好好笑的事．．．．．．

事緣車上太多人了，推住B車總係霸道D，但大家都會好好人都咁體諒讓下你咁，特別係你想落車時，但昨晚就有個例外，有個企係扶手中間又矮又瘦的男人，睇到聴到我叫唔該借借都當無到，仲伸長成隻手臂撐住扶手(另一隻手叉住腰)(扶手同佢身體中間大把空間)，望了我一下，郁都唔郁下，我心諗ok你唔讓咪算咯，等陣落車唔好話我撞到你就得．．．．．．

點知到我落車時，我已經一邊大大聲叫唔該借借，佢唔借過仲不單止，仲係度鬧我話我撞到佢對鞋喎，我初初都諗住忍下就算，點知佢仲係度嘈又唔讓開，我話鬼之佢，見人地剛好落車有少少空間就攝出去，跟手仲掉低一句“點啊，落車係咁架啦，你叉晒腰咁叫人點落車啊”，講完車門剛好關左，只係聽到個男人係後面好惡咁鬧：“我點叉腰啊……”，可惜車已開走了．．．．．．

個刻真係覺得好好笑同好心涼，以依D咁自卑去到邊都不自覺叉腰扮大隻的男人，跟住落來的旅途都俾人望到實，無得再叉腰的感覺一定會好唔自在．．．．．．